बुधवार, 18 दिसंबर 2013

महु ह पीएम बनहुं...


वो दिन निहाली ह बिहिनिया बिहिनिया घाम तापत बइठे रीहिस, ततके म ओखर नाती ह आगे, अऊ डोकरा उपर झपाके कहात हावय, ए बबा महु ह पीएम बनहु, महु ल पीएम बना दे, का का करे ल पड़ही बता देतेस त वइसने वइसने कर दुहुं।
 ओखर गोठ-बात ल सुन के वो तीर जतका झन रीहिस ततका जम्मो झन हांस डारिन, फेर सरजू ह कीहिस अबे ते हा बने बढ़ लिख ले बड़े बन जा तब पीएम बनबे, अभी त तोर उमर ह नहीं होय हावय, पीएम बने बर पढ़ई लिखई के संग चुनाव घलो जीते ल पड़थे।
  फेर निहाली के नाती कहां मानने वाला हे वो ह कहे लागीस। हमर देस के पीएम मनमोहन सिंह ह त कभु चुनाव नहीं लड़े हे फेर कइसे बनगे। वोला कोन समझातीस।
 बात ल टारे बर जीवराखन ह कही दिस, जा भाग एमेर ले बड़े-बड़े तीर नहीं लागय।  फेर वोहा कहां मानने वाला हे जतका रेडिया  टीवी म सुने हे ततके ल बपरा ह जानथे। कहे लागीस वाह महु ल पीएम बनना हे। भाजपा वाला मन ह नरेन्द्र मोदी ल पीएम बना दे हावय अऊ कांग्रेस  ह घलो राहुल गांधी ल पीएम बनाबो काहत हे। ए बबा मोला ते हा पीएम बना दे न गा। तोर का बिगड़ही तेहा हौ कहा तहा ले सब  ल मै ह मना लुहु। मोरो टीवी म  फोटो आही। मे ह टीवी म देख देख के जान डारे हौ पीएम कइसे बनथे। फेर वोला कोनो समझा नहीं सकीस, साफ कही दिस वोखर संग पढ़ईया जम्मो लइका मन ह तैयार हे। वो ह किलास म का स्कूल म अउवल आथे अब त गांव वाला मन ह घलो कथे के निहाली के नाती अड़बड़ होशियार हे। निहाली के नाती के जिद ह बाढ़तेच जात रीहिस पढ़ई लिखई ल छोड़ ओखर पूरा ध्यान ह पीएम म लग गे।
खवई पीडई, खेलई, कुदई सब ल भुला दे हावय एकेच ढन रट लगाय हावय सब झन ह टीवी वाला ल कहाव के निहाली के नाती समारू ह पीएम हे। ओखरे फोटो छपही। गांव वाला मन असकटा गे त भुलवारे बर वोला कही दिस ले आज ले तै पीएम होगेस। अतका ल सुन के समारू ह खुश होगे हावय अऊ स्कूल मर म तावत रथे मैं पीएम बनगेव मैं पीएम बनगेव। अब वोलो कोन  समझावय के पीएम का होथे। भाजपा ह एखर पहिली लालकृष्ण आडवानी ल पीएम इन वेटिंग घोषित करें रीहिस, आज तक बपरा ह वेटिंग म लगे हे।